معجز شبستری

دانیشماز بلبل شیدا، گلستان اولمیان یرده
گونول شاد اولماز هرگز باغ و بستان اولمیان یرده

گوزوم باده، سرشکم می، مزه م غم غصه ای ساقی
شرابی نیلرم من، تازه جانان اولمیان یرده

یاخاسین ییرتمییدی، وورمییدی باشینه سیلی
نی نیه یدی بس بو ملت، علم و عرفان اولمیان یرده

دییرسن ساقیا، حاجی گولور پاریس شهرینده
مگر آغلار بنی آدم مسلمان اولمیان یرده

فرنگی دلبر الده باده هر دم سویلر: ای عاشق
نئجه زیست ایله سیز خوبرویان اولمیان یرده

الوندن ایچمه سین باده، لبوندن آلماسین بوسه
مقدس نیله سین بس، حور و غلمان اولمیان یرده

ملامت ائتمه واعظ آغلارام قیرخ ایلدور ایراندا
نولور بش گونده گولسم آه و افغان اولمیان یرده

دونن بو مصرعی بلبل اوخوردی صحن گلشنده
چتیندور دین و ایمان ساخلاماق نان اولمیان یرده

نه رشوتخوار و نه سارق نه واعظ خاک مغربده
تاپولار بیله ملعونلار دبستان اولمیان یرده

دئدیم گل بیر گئده ک واعظ کلیسایه، دئدی حاشا
عبادت ائتمه رم من چای و قلیان اولمیان یرده

خیال خام جنتله گونول خوش ائتمه ای زاهد
گویرمز لاله و گل، برف و باران اولمیان یرده

نه چاییله قیزار جانین، نه کنیاکیله ای معجز
دوغیدی کاش آنان سنی، زمستان اولمیان یرده

نه خوشدی بیر صنم مه جمالیلن یاشاماق
همیشه عزت و جاه و جلالین یاشاماق

فراق دردینه بیر چاره ایلیون یاران
محالیدور گجه گوندوز او حالیلن یاشاماق

امید وصلیله خوش ساخلا خاطرین عاشیق
فراقه چاره ائده نمزملالیلن یاشاماق

فقیه مدرسه هرگز یِمزدی مال حرام
اگر میسّر اولیدی حلالیلن یاشاماق

بهار عمری گچیبدور بیزیم تکذبانین
دوشوب خیالیمه بیر نونهالیلن یاشاماق

اسیر شهوت اولوب عقلین ایلمه زایل
سنه یاراشماز عموجان، مارالیلن یاشاماق

جوان ایچوندی دف و نای و مجلس و عشرت
قوجایه عیب دی زورنا قاوالیلن یاشاماق

جلال سلطنت آلداتماسین سنی ای قیز
ئولوم کیمی آجیدور آغ ساقالیلن یاشاماق

دئدیم اوتور دیزیم اوسته، اَیا نگار جوان
که خوشدی معجز شیرین مقالیلن یاشاماق

دئدی چکیل اویانا سورتمه ساققالین ئوزومه
منیم ایشیم دگی جنگ و جدالیلن یاشاماق