خاللار ،گوللر بیر بیریندن اویمه لی
تئللی سازی چالانا باخ چالانا
هایاندادی هچ اوزومده بیلمیرم
منی مندن آلانا باخ آلانا
ساز یاشاییر زیللر بملر ایچینده
اوتن چاغلار، گلن دملر ایچینده
بیر عالمدی بو عالملر ایچینده
بیزدن سونرا قالانا باخ قالانا
گورن فیکری هاردا نه ده قالیبدی
هانسی خالدان جاندا زده قالیبدی
دیرسک دیزده ال چنه ده قالیبدی
خیاللارا دالانا باخ دالانا
داغ یرییر قایا اوچور داش دوشور
اصلی یانیر گوزدن قلبه یاش دوشور
ارضرومون گدیینه قیش دوشور
له له کوچور تالانا باخ تالانا
نسیللرین یانغیسی وار آدیندا
هامیدان چوخ کرم قالیب یادیندا
آی "زلیم خان "کوله دوندون اودوندا
دئمه سینلر یالانا باخ یالانا.
