پەژارەت شادٚیم جە بێخ ئاوەرڐەن
دووریت خەیمەی دڵ ریشەکەن کەرڐەن
فیراقت فەرقم وە تووتیا کەرڐ
جیاییت ئازام جە هەم جیا کەرڐ
وەسواسەت وەی تەور نێش دان وە جەرگم
وە مەرگت قەسەم ڕازیم وە مەرگم
وێت بدەر ئینساف نەونەمام نۆ
مەرڐەن خاستەرەن یا خۆ دووری تۆ؟
مەرڐەن یەک ساتەن ئەرواحەکەی وێم
دووریت هەر ساتێ سەڐ مەرگەن پەرێم
مەر جەستەی خەستەی من جە فوولادەن
یەند دووریت وینۆ هێمان دڵشادەن
دەک ڕەحمەت ئەو قەبر گشت وەفاداران
خسووسەن ئەو کەس شای وەفاداران
#مەولەوی
🌹🌹🌹
