ای پرچم اسلام نه سرعتله اسورسن
عباس دوشور تپراقا سنده تله سورسن
اولما گل امیدیمی سن پرپر ائدورسن
قولسوز گوروب عباسی بله لنگر ائدورسن
چوخ زحمتیوی چکدی سنون جعفرطیار
جان قویدی بابام شیرخدا حیدرکرار
راضی دگلم منده سنی خوار ائده اشرار
سن دینمیزون پرچمی سن یاتماقا اسمه
السیز باشیم اوستن یخیلوب سایوی کسمه
من گوزلیورم قانلی گوزوم تک سنی الان
فکریم بودی سن اولمیاسان قانیله الوان
گورسه سنی قان آغلامیا عترت سلطان
ممکندی ائدن وقته باجیم عزم مدینه
سوقات آپارا بیکس آنام ام بنینه
ال گیتدی بو گوزلرده کی القانی سیلنجه
من ویرمدیم الدن سنی اللر کسیلنجه
ایکاش حسینیم گله شام اهلی گلینجه
اظهار رضایت ائده عالی روشیمدن
تحویل آلا ئوز ویردیقی شمشیری دیشیمدن
شه گلمسه بیگانه منیم حالیمی بیلمز
قانیله دولان گوزلریمی ئوزگه سی سیلمز
دشمنلریمه باشیم عمود آلتدا اگیلمز
سن اگمه منی قوی دایانیم ئوزسوزوم اوسته
دین پرچمیسن دوشمه یره قال گوزوم اوسته
قوی سسلیوم الان شه عالم ئوزی گلسون
عشقیم هوسیم روحیم علاقم ئوزی گلسون
صبرایله بیرآز صاحب پرچم ئوزی گلسون
یاتما منی سیندیرما بو دشمن قاباقیندا
قوی گلسون حسینیم یخلیم من قاباقیندا
مأیوس اولوب القصه الیندن علمیندن
سیندی اوره گی اوخ ستمندن سو غمیندن
گوردی الی بوش گیتماق اوزاقدور کرمیندن
سسلندی حسین لطف ایله السیز باشا باش چک
شاهیم بیوگوم گل بو کیچیک قارداشا باش چک
سقا قولی گر دوشسه حرم ساخلیا بولمز
اوخ دگسه اگر مشگیده نم ساخلیا بولمز
آخر بو کسیک قوللار علم ساخلیا بولمز
لنگر ایلدی بیرق امان ویرمدی تزگل
قان دولدی حسینجانی گوزوم گورمدی تزگل
التماس دعا گلم
